Në një lidhje direkte nga “Çadra e Lirisë”, kryetari i Partisë Demokratike ka komentuar për herë të parë vendimin e Presidentit Nishani për dekretimin e ministrit të Brendshëm, Fatmir Xhafaj. “Presidenti mori vendimin e duhur kushtetues”, ka deklaruar Lulzim Basha për dekretimin e Xhafajt. Presidenti Bujar Nishani nuk e pengoi emërimin e Fatmir Xhafajt në krye të ministrisë së Brendshme. Presidenti i qëndroi besnik Kushtetutës, edhe pse, vlerësimi tij për ministrin e propozuar ishte negativ. “Në vlerësimin tim kandidatura e ministrit te brendshëm është e papërshtatshme, por Kushtetuta nuk ia jep të drejtë Presidentit të Republikës për të refuzuar një kandidaturë për ministër”, u shpreh Kreu i Shtetit.
Më tej përballë panelit të të ftuarve dhe gazetares Rudina Xhunga, Basha ka komentuar edhe turin e tij ndërkombëtar. “Nesër do nisem në një tur ndërkombëtar, ku do të shkoj edhe në SHBA”. Në fund lideri i opozitës ka thënë se “Çadra e Lirisë” nuk pengon qarkullimin rrugor, por atë të drogës. “Çadra nuk pengon qarkullimin rrugor, synon të pengojë qarkullimin e drogës dhe të krimit”, është shprehur Lulzim Basha në emisionin Dritare.
